ជំនួបដោយផ្ទាល់នៅប៉ុន្មានម៉ោងក្រោយការប្រដាល់ឈ្នះជើងខ្លាំង ឡៅ ស៊ីណាត កីឡាករ វង្ស ណយ បានបញ្ជាក់ប្រាប់VODដោយមុតមាំថា គេលាឈប់ការប្រដាល់ហើយ ដោយបានទាំងអះអាងថា ការប្រដាល់ជាមួយកីឡាករ ឡៅ ស៊ីណាត ដែលទើបនឹងសងសឹកបានក្ដៅៗ ជាការប្រដាល់លើកចុងក្រោយរបស់ខ្លួនទៀតផង។ លោកថា ការសម្រេចចិត្តនេះគឺដើម្បីប្រពន្ធកូន និងដើម្បីស្វែងរកផ្លូវមួយសម្រាប់ជីវិតដែលប្រសើរជាងការប្រដាល់។ លោកនិយាយថា លោកសប្បាយចិត្តណាស់ ដែលការប្រដាល់បិទអាជីពរបស់លោក បានឈ្នះ ឡៅ ស៊ីណាត ក្នុងទឹកទី១ ដើម្បីទុកជាស្នាដៃមុនបាត់មុខ ។
ជ័យជំនះរបស់ វង្ស ណយ បានបញ្ចប់ក្រោមក្រសែភ្នែកអ្នកទស្សនាយ៉ាងច្រើនកុះករ ទាំងនៅសង្វៀនទូរទស្សន៍បាយ័នដោយផ្ទាល់ និងតាមកញ្ចក់ទូរទស្សន៍។ លោកធ្វើឲ្យអ្នកគាំទ្រជក់ចិត្តយ៉ាងខ្លាំង ជាពិសេសការវាយកែង ដើម្បីបំបាក់កីឡាករជើងចាស់ ឡៅ ស៊ីណាត ឲ្យរាប់ដល់១០ ដោយគ្មានការតវ៉ា។
តាំងពីចាប់ផ្ដើមល្បីឈ្មោះរៀងខ្លួន អ្នកទាំងពីរប៉ះគ្នា៤លើករួចមកហើយ សរុបទាំងលើកចុងក្រោយកាលពីថ្ងៃអាទិត្យនេះផង ដោយ២លើក វង្ស ណយ សន្លប់ និង២លើក ឡៅ ស៊ីណាត សន្លប់។ លទ្ធផលចុងក្រោយ បង្ហាញថា លោកសងសឹក ឡៅ ស៊ីណាត បាន និងជាម្ចាស់ពានកិត្តិយសរបស់ក្រុមហ៊ុនគូប៊ូតាដែលជាការចង់បាន លើកចុងក្រោយ។
កីឡាករ វង្ស ណយ បញ្ជាក់នៅក្រោយប្រកួតឈ្នះឡៅ ស៊ីណាត ថា លោកមិនប្ដូរជំហរងាកមកបន្តការប្រដាល់ទៀតទេ បើទោះជាលោកបានឈ្នះ ឡៅ ស៊ីណាត ដែលធ្វើឲ្យលោកមានកម្លាំងចិត្តខ្លាំងជាងមុន។ កីឡាករជើងខ្លាំងវ័យ២៨ឆ្នាំរូបនេះនិយាយថា «ខ្ញុំសូមបញ្ជាក់ថា ខ្ញុំប្រកួតជាមួយកីឡាករ ឡៅ ស៊ីណាត គឺជាការប្រកួតលើកចុងក្រោយ ព្រោះខ្ញុំសន្យាជាមួយប្រពន្ធខ្ញុំ និងកូនខ្ញុំច្បាស់ហើយ»។
លោកប្រាប់ថាឆ្អែតឆ្អន់ចំពោះការប្រដាល់ ដែលទោះជាបានល្បីឈ្មោះ ក៏បានត្រឹមល្អមើល ហើយធាតុពិតរកប្រាក់សឹងតែបង់ថ្លៃផ្ទះ និងចិញ្ចឹមកូនប្រុសមួយមិនរស់។ ប្រសិនបើលោកនៅតែបន្តអាជីពប្រដាល់ លោកអះអាងថា ប្រហែលជាគ្មានអនាគតនោះទេ ពិសេសនៅពេលណាមួយភ្លាត់ឲ្យមានរបួសធ្វើការលែងកើត ដូចកីឡាករ បឺត ខាំ ដែលពេលនេះសូម្បីតែធ្វើការធ្ងន់ក៏មិនបាននោះ «ក្រោយពីការប្រកាសនេះ ខ្ញុំនឹងឈប់ប្រដាល់ ទោះជាវ៉ៃម្ដងបានប៉ុន្មានក៏ដោយក៏ខ្ញុំមិនអាចបន្តការប្រដាល់ទៀត ដែរ ព្រោះខ្ញុំមើលឃើញថា បើកាន់តែចាស់បន្តិចទៀត នឹងហួសពេលស្វែងរកអនាគតសម្រាប់ខ្ញុំ និងកូនខ្ញុំ»។ការប្រកាសរបស់លោកបានធ្វើឲ្យមហាជនភាគច្រើនស្លុតចិត្ត ខណៈដែលអ្នកគាំទ្រទាំងនេះ បានទទូចលោកប្ដូរជំហរ ប៉ុន្តែលោកថាហួសពេល។ កីឡាករដែលមានកូនប្រុសវ័យជាងកន្លះឆ្នាំរូបនេះបន្តថា ការប្រដាល់បានផ្ដល់កិត្តិយសឲ្យលោកតែក្នុងពេលឈ្នះប៉ុណ្ណោះ ប៉ុន្តែបើចាញ់នោះសំឡេងត្មិះដៀល និងការប្រមាថនឹងឮណែនត្រចៀក ដោយអ្នកទាំងនោះមិនបានវិភាគថា ហេតុអ្វីបានកីឡាករខ្លាំងម្នាក់កម្លាំងមិនដល់គេនោះទេ។
លោកមិនបញ្ជាក់ថា អ្វីជាគោលដៅបន្ត ក្រោយការលាឈប់នោះទេ ខណៈដែលលោកគ្រាន់តែព្រលយថា រៀបចំគម្រោងច្បាស់ហើយ ជំនួសឲ្យការសម្រេចចិត្តនេះ ។ វង្ស ណយ ផ្ញើសារចុងក្រោយថា «ខ្ញុំប្រដាល់ប្រមាណ១០ឆ្នាំនេះ ខ្ញុំចង់ប្រាប់ថាអត់មានសល់អ្វីក្រៅពីសំបកខ្លួននោះទេ ទើបខ្ញុំសម្រេចចិត្តដើរចេញ ហើយបើគ្មានការទទូច អង្វរទេ ប្រហែលជាខ្ញុំត្រូវដើរចេញតាំងពីមុនប្រកួតជាមួយ ឡៅ ស៊ីណាតនោះទៅទៀត!» ។
មកដល់ពេលនេះ លោកកាន់ខ្សែក្រវាត់ពិភពលោក២មកពីប្រទេសបារាំង និងពានមួយដែលទើបដណ្ដើមបាន។ លោក តែម ម៉ឺន ប្រធានសហព័ន្ធកីឡាប្រដាល់កម្ពុជាមិនលើកទូរស័ព្ទឆ្លើយពាក់ព័ន្ធនឹង បញ្ហានេះទេ ប៉ុន្តែកន្លងមកលោកបានបញ្ជាក់ថា សហព័ន្ធគ្មានសិទ្ធិបង្ខំកីឡាករណាម្នាក់នោះទេ ហើយសហព័ន្ធក៏មិនមានលទ្ធភាពផ្ដល់តម្លៃខ្លួនឲ្យកីឡាករល្បីដូចគ្នា នឹងកីឡាករបរទេសបានទេ៕
Post a Comment