គំនិតច្នៃប្រឌិតក្នុងការបង្កើតអាជីវកម្មខ្នាតតូចរបស់យុវជនកម្ពុជា ម្នាក់ គឺការលក់បាយចល័តកំពុងតែមានការគាំទ្រពីអតិថិជន ជាពិសេសអ្នករស់នៅ និងប្រកបមុខរបរអាជីវកម្មក្នុងក្រុងភ្នំពេញ។
យុវជន បុល វ៉ាន់នៀត ម្ចាស់អាជីវកម្មខាងលើ បញ្ជាក់ថា លោកបានប្រកាន់គោលការណ៍ ៥ យ៉ាង ដើម្បីសម្រេចបានជោគជ័យសម្រាប់អាជីវកម្មរបស់ខ្លួន។ អាជីវកម្មប្រភេទនេះ ទើបតែបង្កើតឡើងនៅដើមខែមិថុនា ឆ្នាំ២០១៤ ហើយរហូតមកដល់ពេលនេះ សេវាកម្មនេះគឺមានតែ ២រទេះ និងបុគ្គលិកចំនួន ១៤នាក់តែប៉ុណ្ណោះ សម្រាប់បម្រើសេវាកម្មជូនអតិថិជន។
ភាពជោគជ័យដែលទទួលបាននៅពេលនេះគឺថា ក្នុងមួយថ្ងៃអាចរកប្រាក់ចំណូលបាន ៤០០ដុល្លារ ដោយបាយមួយកញ្ចប់លក់ក្នុងតម្លៃ ១ដុល្លារ ។
ម្ចាស់អាជីវកម្មលក់បាយសាច់ជ្រូកចល័ត លោក បុល វ៉ាន់នៀត ប្រាប់គេហទំព័រ The BNEWS នៅព្រឹកថ្ងៃទី១០ កក្កដានេះថា អាជីវកម្មនេះបង្កើតឡើងមានគោលបំណងសំខាន់នោះ គឺទី១. ដើម្បីផ្លាស់ប្តូរផ្នត់គំនិតអតិថិជនដែលកាលពីមុនធ្លាប់តែគិតថា ការលក់នៅតាមរទេះគឺគ្មានអនាម័យ ដូច្នេះត្រូវព្យាយាមច្នៃប្រឌិតរបរនេះឲ្យមានការទទួលស្គាល់ពី គុណភាពអនាម័យល្អដែលអាចទទួលយកបាន។ ទី២. ផ្តល់ឱកាសការងារសម្រាប់និស្សិតកម្ពុជា ដើម្បីជួយផ្គត់ផ្គង់ថ្លៃការសិក្សារបស់ពួកគេ ទី៣.គឺដើម្បីបង្ហាញស្នាដៃរបស់យុវជនខ្មែរ ដល់ភ្ញៀវទេសចរណ៍បរទេសឲ្យបានភ្លក្សស្នាដៃច្នៃប្រឌិតរបស់យុវជន ខ្មែរ ។
នៅក្នុងគំនិតច្នៃប្រឌិតលក់បាយសាច់ជ្រូក ចល័តនេះ យុវជនខាងលើ មានគោលការណ៍ ៥យ៉ាងដើម្បីសម្រេចឲ្យបានភាពជោគជ័យនៃផែនការអាជីវកម្មនេះ នោះគឺ៖
១. អនាម័យ ៖ យកចិត្តទុកដាក់ទៅលើការចម្អិន ការវេចខ្ចប់ និងសំភារៈប្រើប្រាស់
២. សេវាកម្ម ៖ បង្កភាពងាយស្រួល រហ័សទាន់ចិត្ត និងមានក្រមសីលធម៌ល្អជាមួយអតិថិជន
៣. រសជាតិ ៖ ផ្តល់រសជាតិថ្មីៗ ដែលជាតម្រូវការរបស់អតិថិជន
៤. តម្លៃ ៖ ការលក់មានតម្លៃសមរម្យ មិនថ្លៃពេក
៥. ការច្នៃប្រឌិតសំភារៈលក់ ៖ រទេះលក់មានការច្នៃប្រឌិត និងតុបតែងឲ្យមានការទាក់ទាញ។
តាមការឲ្យដឹងពីយុវជននេះ បច្ចប្បន្នអាជីវកម្មលក់បាយចល័តកំពុងដាក់លក់នៅ ៥ទីតាំងសំខាន់ ដូចជានៅជិត Naga world អគារភ្នំពេញសេនធ័រ ផ្សារ AEON ជិតក្រសួងទេសចរណ៍ចាស់ និងចល័តតាមផ្លូវក្រមួនសរ។ អាជីវកម្មនេះមានគម្រោងពង្រីករទេះលក់ឲ្យបាន ១០ រទេះនៅក្នុងរាជធានីភ្នំពេញ នៅចុងឆ្នាំ ២០១៤ ខាងមុខនេះ ៕
អត្ថបទ ៖ ចាន់ សុខ នាង From BNEWS
Post a Comment